អ្នកសង្កាត់ព្រៃស នាំគ្នាទៅធ្វើបុណ្យ តាមព្រំដែន ជួបគ្រោះក្រឡាប់ រថយន្ត ស្លាប់ ១២នាក់ របួស២៤នាក់

ឧត្តរមានជ័យ៖ ប្រជាពលរដ្ឋក្នុងសង្កាត់ព្រៃស ខណ្ឌដង្កោ ៣៦នាក់ នាំគ្នាទៅធ្វើបុណ្យ​តាម​បណ្តាវត្តនៅតាមជាយ ដែន​​ ក្នុងខេត្តឧត្តរ​មានជ័យបានជួបគ្រោះថ្នាក់ចរាចរ ក្រឡាប់​រថយន្តធ្លាក់ពី​លើភ្នំដងរ៉ែក បណ្តាលឲ្យស្លាប់ ១២នាក់ និងរបួស២៤នាក់ នាម៉ោង ១០ និង​៣០នាទីថ្ងៃព្រហស្បតិ៍ ទី១៣ ខែសីហា ឆ្នាំ២០១៥នេះ នៅភូមិជើង ភ្នំឃុំត្រ ពាំងព្រៃ ស្រុកអន្លង់វែង ខេត្តឧត្តរមានជ័យ។

លោកឧត្តមសេនីយ៍ ម៉ែន លី ស្នងការនគរបាលខេត្ត ឧត្តរមានជ័យ បានប្រាប់ឲ្យដឹងនៅ​ក្រោយ​ពេល​កើតហេតុភ្លាមៗថា ប្រជាពលរដ្ឋរងគ្រោះទាំងអស់ មានទីលំនៅក្នុងសង្កាត់ព្រៃស ខណ្ឌ​ដង្កោ រាជធានីភ្នំពេញ។ លោក បន្តថា  ក្រុមប្រជាពលរដ្ឋរងគ្រោះ បាននាំគ្នាទៅដើរធ្វើបុណ្យ​នៅតាមបណ្តាវត្តនានានៅជាយដែន ហើយក៏នាំគ្នាហួសទៅ លេងនៅច្រកជាំ តែបែរជួបគ្រោះ​អកុសលតែម្តង។

ក្រោយកើតហេតុភ្លាមៗ លោក ស ថាវី អភិបាលខេត្តឧត្តរមានជ័យ ក្នុងនាមជាគណៈបញ្ជាការ​ឯកភាព​ខេត្ត បាន បញ្ជាកងកម្លាំងសមត្ថកិច្ច អាជ្ញាធរ រួមទាំងរថយន្តសង្រ្គោះគ្រប់អង្គភាពចេញទៅជួយសង្រ្គោះប្រជាពលរដ្ឋភ្លាមៗ  ហើយជនរងគ្រោះ ក៏ត្រូវបានបញ្ជូនមកសង្រ្គោះ​បន្ទាន់នៅតាមមន្ទីរពេទ្យនៅស្រុកអន្លង់វែង និងក្នុងទីរួមខេត្ត។

បើតាមលោកឧត្តមសេនីយ៍ ម៉ែន លី ជនរងគ្រោះដែលស្លាប់ ១២នាក់ មានស្រី ១១នាក់ ហើយ​អ្នករងរបួស២៤ នាក់ មានស្រី២២នាក់។ លោកស្នងការ ក៏បានបញ្ជាក់ផងដែរថា ជនរងគ្រោះ​សុទ្ធតែជាមនុស្សចំណាស់។

ទោះបីជាយ៉ាង លោកស្នងការមិនទាន់បញ្ជាក់ពីមូលហេតុ នៃការក្រឡាប់រថយន្តនេះ​នៅឡើយ​ទេ៕